Inwoners van Matjhabeng “getuies van die finale stadiums van ineenstorting”

‘n Versoek vir dringende ingryping in die stand van sake van die Matjhabeng-munisipaliteit se dienslewering sal nou aan die LUR vir Samewerkende Regering en Tradisionele Sake (Cogta) gerig word.

Raadslid René Steyn, Demokratiese Alliansie (DA) raadslid vir wyk 32, sê sy gaan aan LUR Saki Mokoena hieroor skryf. Steyn sê inwoners meld dag na dag waterlekke aan wat sonder toesig vloei, riool wat in huise en strate terugvloei, en misdaad wat gedy as munisipale infrastruktuur gevandaliseer en onbewaak lê.

“Gemeenskappe kry swaar, maar daar is steeds stilte van diegene aan wie dit toevertrou is om te dien. Terwyl inwoners meedoënloos onder druk geplaas word om vir dienste te betaal, is daar geen spoor van teenprestasie nie. Die einste mense wat die stelsel finansier, word daardeur in die steek gelaat. Dit is nie net ‘n administratiewe mislukking nie, maar eerder ‘n administratiewe verwaarlosing. Dit is moeilik om te glo dat hierdie vlak van gebrek aan optrede toevallig is. Amptenare ignoreer e-posse, oproepe en formele verslae. Is dit die standaard van sorg wat ons nou in Matjhabeng moet aanvaar?

“Ons is getuies van die finale stadiums van ineenstorting. Die munisipaliteit het ‘n draaideur geword van leë vergaderings, herwonne verskonings, en geen resultate nie,” sê Steyn.
Ongeag die forum of platform, of dit nou ‘n raad, gemeenskapsforum of openbare voorlegging is, bly die uitkoms dieselfde, sê sy.

Beloftes van dienslewering word ‘n kwessie van roetine gemaak, maar dit bereik dikwels nie diegene wat die stelsel aan die gang hou nie. “Die paar wat nog betaal, word uitgebuit, hul bydraes verlore in ‘n siklus van wanbestuur en politieke prioritisering.”

Inwoners in dele van dié wyk sit nou al tot vier dae sonder water.
“Tientalle op dosyne lekkasies word nie herstel nie. Elektriese infrastruktuur word gevandaliseer en gestroop. Amptenare verdwyn, en departemente bly onbereikbaar.”

Die ANC-geleide regering het die fondamente van verantwoordelike plaaslike bestuur in Matjhabeng heeltemal afgebreek. “Hierdie munisipaliteit word tot op die rand van geen terugkeer gestoot, dit alles terwyl die maghebbers hul belange bevorder ten koste van die publiek waarvoor hulle verkies is. Ons sal voortgaan om hierdie sistemiese verrotting bloot te lê. Ons sal voortgaan om elke lekkasie, elke mislukking en elke ontduiking aan te meld. Ons sal nie toelaat dat stilte aanspreeklikheid vervang nie,” sê Steyn.